محمد سميح يكتب: تعرف بيبو؟

الدستور 0 تعليق ارسل لصديق نسخة للطباعة تبليغ

أبويا ربنا يديله الصحة علمنى إنه لا يصح إلا الصحيح، علشان كده كان طبيعى إنى أعلن دعمى للخطيب من أول لحظة قرر فيها نزوله انتخابات الأهلى على كرسى الرئيس.
المنطق كان بيقول إن الخطيب لازم يكون رئيس النادى، وإن الناس هتنزل تنتخبه.
الخطيب مش مجرد لعيب كورة عدى على النادى العريق، لأ.. ده أسطورة مش بتتكرر كتير.
الخطيب تاريخ طويل لو قعدنا نتكلم عنه مش هنخلص.. الخطيب رمز بيفتخر بيه كل محب وعاشق للفانلة الحمرا.
الراجل ده ماطلعش بين يوم وليلة.. ده له فى قلب كل أهلاوى علامة مش ممكن تتمسح.
كان لازم الناس تنزل بالعدد ده.. ماكنش مهم إحنا وقفنا قد إيه على رجلينا فى طوابير طويلة فى مشهد تاريخى علشان نقول له شكرًا على كل حاجة جميلة عملتها للنادى.
دى ماكنتش مجرد انتخابات ولا منافسة على منصب رئيس النادى.. دى كانت رسالة حب ورد للجميل لنجم حفر اسمه بحروف من دهب فى تاريخ الرياضة المصرية.
فوزه كان واضح من الساعات الأولى فى الانتخابات لما الطوابير بدأت بدرى بدرى.. لا.. ده الفوز كان واضح أساسًا من أيام الندوات، ومش هانسى كلمة قلتها لصاحبى الصحفى النابه محمود شوقى يوم ندوة بيبو فى الجزيرة لما شفت الحشود اللى حضرت الندوة «اللى عايز يعرف يعنى إيه بيبو يجى يشوف الناس اللى واقفة على رجليها ساعتين علشان تسمعه وهو بيتكلم معاهم».
فوزه كان باين لما لقيت الناس بتشيل بوستراته من على الجدران اللى فى النادى علشان تروح بيها، ولما شفت ناس كبيرة جاية على كراسى متحركة وتقول وسعوا الطريق علشان أنا داخل أنتخب الخطيب.
فوزه كان لازم يحصل علشان زى ما هو قال: صوت عضو الجمعية العمومية بألف صوت، لأننا كنا بنمثل ملايين كانت بتترجانا ما نخذلهاش وماكنش ينفع نخذلها علشان دى الجماهير اللى صنعت تاريخ وكيان الأهلى.
مش هانسى كلمة عضو فى النادى قالهالى فى بداية الانتخابات «ماينفعش الخطيب ينزل انتخابات ونسقطه»، ده كان إيمانُنا وكان هدفنا اللى اشتغلنا عليه وكان كل واحد فى الجمعية العمومية بيدعو للخطيب كأنه شغال فى حملته مع إننا ماكناش نعرف طريق الحملة دى فين ولا يتراح ازاى.
الخطيب زرع كتير وأول امبارح كان يوم الحصاد، والحمد لله إنه حصد كل الخير اللى زرعه فى نفوسنا.
إحنا بعد إعلان النتيجة أدينا مهمتنا واللى جاى مهمة بيبو ومجلسه واحنا هنفضل فى ضهرهم لأننا متأكدين إنه هينفذ كل وعوده للأهلاوية، والكيان معاه هيكبر أكتر وأكتر.
أنا فخور بانتمائى للأهلى وفخور إن الخطيب هو رئيس الكيان، ولأنه عودنا إننا نحترم بعض وإن كل واحد بيكمل دور اللى قبله ويبنى عليه، فلازم برضه نقول للمهندس محمود طاهر، شكرًا على اللى عملته للنادى خلال فترة رئاستك.

تم نقل هذا الخبر , والمصدر هو المسئول عن صحة الخبر أو عدمه.
المصدر : الدستور

إخترنا لك

أخبار ذات صلة

0 تعليق